LIVE SummerNight 2006
Am 9.September 2006 hän mir uf em Hof Ebnet e PartyNacht unter freiem Himmel gfiirt.
Uf dr Open-Air-Bühni het d Band GROOVEPACK mit ihrem Funky-Blues für musikalischi Höheflüg gsorgt.
Dr zue hets Schnitzelbrot und Würscht vom Grill und e feini Bowle sowie die legendäre Chrasftstoff 5 Cocktails geh.
Vor, zwüsche und nach dr Live-Band hets natürlich wie immer Disco mit chraftstoffmässigem Oldies-Rock-Pop-Stimmigssound
sowohl dusse unter freiem Himmel als au in dr Innebar geh.
Vieli Party-Pictures und sogar Filmli vo dem Alass gits im Foto Album.
Mondschin-Nacht, Bowle und Sofa Lounge
S wichtigscht vorweg ... s Wetter het gstummme, au wenn d Temperature nid ganz summerlich gsi sin.
Aber es het glängt, ass mer die Mondschin-Party-Nacht in volle Züg unter klarem Himmel hän chönne gniesse.
In unserer gmüetliche Outdoor Sofa Lounge het me chönne vom Alltag abschalte
und dr Obe so richtig entspannt chönne gniesse.
Zur Istimmig uf d LiveBand hets am Afang e feini Bowle vo dr Yael geh.
Und euse Grillmeischter dr Classen het feini Würscht vom Grill und Schnitzelbrot
zuebereitet.
LiveBand GROOVEPACK OpenAir
Wo d LiveBand GROOVEPACK churz nach 22 Uhr s erst Mol d Bühni betrette het,
hän bereits e huffe guet ufgleiti Party-Gäst dr Weg uf dr Ebnet gfunde gha und
d Stimmig isch bereits heiter gsi.
Mit ihre abwechsligsriche funkige Blues-Nummere, besser als in ere "rauchige Blues-Bar irgendwo in Amerika",
hän sie eusi Gäst entzückt. Es het richtig Spass gmacht dene Musiker us dr Region bi ihrne Blues-Improvisatione
zuezslose. Speziell isch gsi, ass sie alli Lieder uf ihri ganz eigeni Art interpretiert hän und sie nid eifach
nur abegleieret hän, so wie me das vo andere Cover-Bands kennt. Mit diverse virtuose Saxophon, Mundharmonika, Gitarre, Keyboard, Bass und Schlagzüg
Solo Ilage hän sie de Obe zumene musikalische Erlebnis gmacht. Es isch für uns ganz e bsundeir ehr gsi, die Band uf unserer Bühni
präsentiere z dörfe, schliesslichhän gwüssi Band-Mitglieder au scho Uftritt am Montreux Jazz Festival oder an dr AVO Sesion
gha.
Nach em erste Set vo dr Band, hän mer denn nach vielsitigem Wunsch doch au d Innebar ufgmacht. Nach ere churze Pause het d Band e witeri Stund dr Ebnet grockt.
Witeri Informatione zu GROOVEPACK gits natürlig uf ihrer Homepage: www.groovepack.ch
Disco, Bar, Cocktails, ...
Im Innebereich hän eusi Chraftstoff-DJs für gueti Stimmig mit Oldies-Rock-Pop-Stimmigssound gsorgt. Dr zue hets wie immer feini Drinks und vorallem eusi weltberüehmte Cocktails an dr Bar geh.
Alles in allem a glungeni PartyNacht mit super Musig, gmüetlicher Atmosphäre und viel Chraftstoff 5.
E usfüehrlichs Foto-Album vo dere PartyNight mit vielne witere Bilder und sogar Filmli
gits in dr Chraftstoff 5 Foto Gallery.
Dört cha mä überigens au Kommentär zu dem Event und zu de einzelne Party-Pictures abgeh.