Chraftstoff 5 Greatest Hits
Am 3.Februar 2007 het unseri bereits 15.Party uf em Hof Ebnet stattgfunde. Das isch natürlig en Grund gsi zum en Blick zrug zwärfe uf unseri viele kreative Ideeä ...
S DJ Pult isch als Dracula Grusel Schloss im Stil vo dr Transylvania Party mit viele alte und neue Special Effects usgstattet worde, an dr Bar hän d Seeräuber vo dr Piratasia d Cocktails gmixt, im Zelt isch traditionelli Skihüttestimmig wie an dr "Erste Prattler Skihütte Night" agseit gsi und am Igang hän d Western-Sherifs und Cowgirls für d Sicherheit und s Wohl vo unsere Gäscht gsorgt.
Dr musikalischi LIVE-Leckerbisse hän d Funky Chics us Prattele/Augst zum Beschte geh und d Chraftstoff 5 DJs hän mit de Oldies-Rock-Pop-Greatest-Hits die guete alte Zite loh uflebe. Und dr gröschti Hit isch natürlig wieder mol d Stimmig vom Publikum gsi.
Vieli Party-Pictures und sogar Filmli vo dem Alass gits im Foto Album.
Skihütte, Walliser Raclette und Funky Chics im Zelt
Im Zelt hets Skihüttestimmig und feins Walliser Raclette mit Fendant geh. Ganz nach em Motto vo unserer allererschte Party, dr "Erste Prattler Skihütte Night" us em Joohr 1999.
Wie amigs an unsere summerliche LIVE Events, hets das Mol im Skihütte-Zelt e Live-Band geh. D Funky Chics hän mit ihrne in virtuoser Perfektion vorträgene Funk-Latin-Pop-Rock-Stück d Gäst regelrecht vo de Stüehl grisse und restlos begeischteret. Die 9 junge Musiker us Prattele und Augst sin bi uns zum erschte Mol vor Prattler Publikum uftrette und hän das vo Afang ah problemlos chönne mitrisse. Ihri musik isch wirklich unter d Huut gange.
Party Grusel-Schloss und Piraten Bar
Uf dr Tanzflächi het uf unseri Gäscht unverglichlichi Chraftstoff 5 Stimmig mit Oldies-Rock-Pop Greatest Hits erwartet. Und en ganz bsundere Augefang isch dies Mol unser DJ Pult gsi. Das hän mir als Dracula-Grusel-Schloss im Stil vo unserer dritte Party, dr Transylvania, dekoriert gha und mit vielne Special Effects verseh. E mengä Gascht isch verchlüpft wo bim Deponiere vo sim Musigwunsch plötzlig e Vogelspinne abezchrieche cho isch. Und au euses Skelett het dr ganz Obe unermiedlig abtanzt. Und fascht pünktlich zur Mitternacht hets sogar die legendäri Grusel-Mitternachtsshow mit Gloggeschläg, Donner, Gschrei und andere schreckliche Grüsch inklusive passende Blitz-Liechteffekt geh. Dr Soundtrack vo dere Show isch überigens s selbergmixte Original gsi, wo mir bereits vor 7 Joohr für d Transylvania Party erstellt gha hän.
An dr Bar sin unseri Gäscht nach Beschter Piratasia Manier vo unsere Seeräuber und Piratinne mit de beschte Chraftstoff 5 Drinks und Cocktails verwöhnt worde. Au für d Dekoration vo dr Bar het euse Special-Effects-Baschtler dr Peach es alts Requisit wieder flott gmacht ... die selbstöffnendi Schatz-Truehe mit Totechopf drinn.
Dr gröschti Hit isch aber an dem Obe sicher wieder Mol s Publikum gsi. Unermüedlig hän bis in die früehe Morgstunde no vieli dureghebt und für super Stimmig uf em Hof Ebnet gsorgt. Mir vo Chraftstoff 5 danke all dene Gäscht do dr für ganz herzlig, Dir sind sit langem eins vo de beschte Publikum gsi!