AL CAPONE's NIGHT - das organisierte PartyVerbrechen

am 3.November 2001 isch's uff em Hof Ebnet mafiamässig zue und her gange. die lüt wo choh sin, sin begeischteret gsi und hän in toller atmosphäre e super stimmig verbreitet! nur leider hän sich bi däm thema nid so viel lüt wie au scho zu eus ufe getraut. nur grad 150 zahlti itritt, sin für eusi verhältnis fascht scho es debakel gsi. an derä stell möcht ich dorum nid nur es paar idrück vo dem sunscht glaub würklich sehr glungene fescht vermitle, sondern au es bitzeli (selbscht-)kritisch belüchte wieso verhältnismässig wenig lüt choh sin ...

 lass uns tanzen babyyyy!
au 150 lüt chönne gueti stimmig mache ...
 
also es isch jo scho nid so, ass es wäg dä wenige lüt e schlechti party gsi wär, eigentlich ganz im gegeteil, ich glaub sone gueti stimmig mit nur grad 150 lütlis, das isch scho fascht unglaublich gsi. mä dörf au ruig säge, ass sich viellicht unseri neui altersgrenze "ab 18" zwar negativ uff d'quantität vom publikum usgwirkt het, aber sicher nid uff d'qualität! also an derä stell zerscht ä mol es messi an alli wo cho sin, dir sind würklich es super publikum gsi!
... und schwungvoll durch d'nacht tanze!
im zelt wie immer e gmüetlichi atmosphäre au sunscht wär eigentlich alles perfekt gsi. e mafiawürdigi atmosphäre mit erä kreative dekoration, wie immer mit stimmigsvollem OLDIES-ROCK-POP sound und an dr bar sowohl altbekannti wie au usgfalleni drinks und pizzas für dr hunger zwüschedrinn. als bsunderi atraktion het mä im zelt an dr "Full House" Gambling Bar bim Roulette-Tisch au no es paar getränkeguetschin chönne abzocke.
und am schluss hän mer wie immer d'lüt fascht nümm use bechoh, wüll's nä anschinend so guet gfalle het!
dä het ustanzt gha !

aber am endi blibt natürlich d'frog, wieso ass so wenig lüt cho sin!? schliesslich will euse kassier am endi vom fescht au schwarzi zahle schribe chönne, was bi 150 lüt natürlich schwer wird!
okay, viellicht müen mir eus au an dr eigene nase neh und das thema isch nach dä terroraschläg in dä USA, viellicht grad e chli fehl am platz gsi (was mir bi dr uswahl vom thema, leider nid hän chönne vorusahne!). mir hän aber au eifach müesse gspühre, ass unabhängig vom thema, d'lüt im moment viellicht au eifach gar nid so luscht uff s'feschte hän, das belege au studie, wonach sit dem terror und em konkurs vo dr Swissair, in dr Schwiz viel mehr lüt unter depressione lide, wie in andere johre. im witere isch wie gseit sicher au s'neue itrittsalter ab 18 dr für verantwortlich gsi, ass weniger lüt cho sin, das het sich eifach no z'wenig bi dä ältere lüt umegsproche gha und die jüngere hän jo nümm dörfe choh. uff jede fall wärde mir jetzt aber sicher nid resigniere und bim nögschte fescht halt no mehr energie dri stecke, damit wieder mehr chömme. mir sin uff jede fall überzügt, ass es im februar, wie immer, wieder mehr lüt azieh wird. und wenn das publikum denn au so guet ufgleit isch, wie das mol, denn wird das ganz bestimmt wieder e waaaaahnsinns Party!!!!!

 wenig lüt = mehr platz zum tanze!

so jetzt aber eifach no es paar impressione, vo dem sunscht glungene fescht, für alli die wo's verpasst hän ...

rien ne va plus!
gseht uss wie en echte schatte, isch aber s'werk vo euserer deko!
mir nämme no ein!
diesmol ishc d'garderobe guet bewacht gsi! 		mmmmhhhh, probier ä mol im marc sini pizza uss dr mikrowelle! ;-)
let's dance ... jeaaaahh mann!
was drinksch?
geile sound! chumm mir shake e chli!
die phöteli het überigens en echte tschechische mafiosi gmacht! messi viel mol, Svejda! 		s'dj pult mit em goldige gramophon isch sogar bewacht worde!
shake it, baby!
dr al capone höchschtpersönlich isch au awesend gsi!
hände hoch und proscht!